Mudjer ke mudjer

 

Mudjer ke mudjer

Tá labanta tudu dia tá labuta

Ah! Si atxa un homi ke é homi

Pá longa-bu mon i djuda-bu

Djuntu nhos tá bai lonji

 

Ku fé na nhor Dés,

Ku banhera riba bu anda

I bu konxi tudu kaw

 

Di riba dinheru di benda di pexi

Ô na txon di sukupira tá grita:

“Moia baratu, nhos kompra-m”

Bu konstrui ke-l ke di bo

Pá podi sai di vida sakrifikadu

 

Di pikinoti, banhera na kabesa

Ku bus gentis grandi bu prendi

Valor di trabaja ku onestidadi

Ô bu atxa poku, ô buatxa mutu

E nhor Dés ki bu tá gardesi

Pá ka dexa falta-u un pon

Di kada dia, tudu dia

 

Ah! Mudjer, sima bu fla-m

Si bo sô, sakrifikadu

Bu konsigi tudu ku mesteba

Imajina si bu teneba na bu ladu

Un homi ke homi

Homi ku “H”, nau omi ku “O”

Djuntu nhos ta baba lonji

Linda Nascimento Rocha