Amor ki ta duê

Dja bu flaba mi

Modi ki bu éra siumentu

N atxa grasa, n xinta n ri

Pamodi n ta pensaba

“Kenha ki ta ama é si”

 

Ma ténpu passa

Odja modi ki nu sta gósi

Bu siumis bira duénsa

Bu ka krê nha amor

Bu krê manda na mi

Bira nha dono

 

Má si kel-li é tudu amor

Ki bu ten pa da-n

Diskulpa-m,

Má n ka podi seta-u el

N merese un amor midjór

 

Nha mãe sénpri ta flaba mi

“Nha fidju-fémia, ten juiz na kabésa

Studa i bu trabadja ku vontadi

Bo é mas forti do ki bu ta pensa

Ka bu dexa ningen manda na bo”

 

N sabi, dja bu dura ta pomete

Sénpri ku bus palavras sábi

Má bu ka muda bu manera di ser

Mi, xeiu di speransa, pamodi n gosta di bo

Sénpri n ta kridita na kuzas ki bu ta fla-m

Pamodi kenha ta ama ta púrdua

 

Má bus promésa kuntinua ta ser apenas promésas

Nunka bu ka muda, bu fika inda mas piór ki antis

Bu amor bira agressivo

I bu siumis kada bes mas fórti

Bu roba-n nha paz ki nem

N ka sabi mas modi ki algen ta ri

Ki amor é kel li ki ta duê?

Nha mãe dja flaba mi

Pa-n ka dexa nha felicidadi mô

Di ningen ki ka nha kabésa

Má n ka obi kuze ke-l tinha pa fla-n

Pamodi n pensaba ma dja-n sabia di tudu

Pamodi ke-la n skodje da-u nha mundu

E tudu ki bu da-n é un amor ki ta dué

 

Linda Nascimento Rocha